اشتعال الأحداث في ليبيا بطريقة سريعة

???????????? اشتعال الأحداث في ليبيا بطريقة سريعة ???? هو إيه اللي بيحصل في ليبيا.. ليه الأحداث بتشتعل تاني من جديد وفي ليلة واحدة يحصل اغتيال لرئيس الاستخبارات العسكرية في بنغازي، وهجوم بمسيرة يتسبب في حريق 4.5 مليون لتر وقود؟.. واستقالة محافظ المصرف المركزي في وقت الدينار الليبي فيه بيعاني؟.. ???? علشان بس نبقى فاهمين جذور الأزمة الليبية.. الأحداث دي بتيجي في ظل انقسام سياسي وعسكري مستمر في ليبيا من وقت سقوط نظام القذافي سنة 2011.. من وقتها، البلد بتعيش بين مراكز قوى متنافسة، أبرزها معسكر الشرق بقيادة المشير خليفة حفتر، ومعسكر الغرب في طرابلس بقيادة رئيس حكومة الوحدة الوطنية عبد الحميد الدبيبة.. ???? رغم إنه مفيش دليل مباشر يربط بين الأحداث التلاتة، لكن حصولهم في نفس التوقيت بيكشف الوضع الأمني.. وإن الصراع ممكن يتحول لاستهداف للمنشآت الحيوية في الشرق والغرب.. ???? طيب إيه أول الأحداث وأخطرها؟.. هو إن عدد من المنشآت النفطية والخدمية اتعرض لسلسلة هجمات بطائرات مسيرة.. أعنف الهجمات كانت استهداف خزان بنزين تابع لشركة البريقة لتسويق النفط، وده أدى لاندلاع حريق ضخم وانهيار الخزان بالكامل، رغم إنه كان بيحتوي على حوالي 4.5 مليون لتر من الوقود.. ???? الهجوم استهدف مصفاة الزاوية، الواقعة غرب العاصمة طرابلس، وده تالت هجوم من نوعه خلال يومين فقط.. بس تتابع الضربات بيقول إن الموضوع مش مجرد حادث منفصل أو هجوم عابر، دا نمط متكرر بيستهدف البنية التحتية الحيوية.. ???? بحسب خدمات الإسعاف والطوارئ الليبية، الحريق -الحمد لله- ما أسفرش عن إصابات خطيرة، ومعظم الحالات كانت نتيجة استنشاق دخان النيران.. ???? ورغم محدودية الإصابات، فخطورة الحادث بترجع للمكان نفسه، لأن مصفاة الزاوية أكبر منشأة نفطية عاملة في ليبيا، وبتنتج حوالي 120 ألف برميل نفط يوميا.. ودا بيخلي أي اضطراب فيها له تأثير مباشر على قطاع الطاقة الليبي.. ???? المؤسسة الوطنية للنفط ما أعلنتش مين الجهة المسؤولة عن الهجمات، لكن الشبهات بتتجه لأطراف منخرطة في الصراع المحلي.. خصوصا بعد أيام قليلة من اشتباكات عنيفة بين جهاز مكافحة التهديدات الأمنية والكتيبة 103 مشاة، ودول تشكيلات بيتبعوا مؤسسات حكومة الوحدة الوطنية.. ???? المواجهات دي في الزاوية وصرمان خلفت قتلى ومصابين، واتسببت في إغلاق الطريق الساحلي، وهروب عدد من نزلاء أحد السجون، قبل ما تمتد تداعيات الأزمة وتوصل للمنشآت النفطية والخدمية.. ???? أما تاني حدث هو تعرض مدير إدارة الاستخبارات العسكرية التابعة للقيادة العامة، اللواء فوزي المنصوري، لعملية اغتيال بعد انفجار عبوة ناسفة استهدفت عربيته قدام بيته في منطقة الهواري بمدينة بنغازي.. ???? الاغتيال ده أهميته مش بس في شخصية المستهدف، لكن كمان في مكان وتوقيت العملية.. الهجوم حصل جوه بنغازي نفسها، اللي بتعتبر المعقل الأمني الأهم للقيادة العامة، واستهدف مسؤول من المفترض إنه من أكتر الشخصيات معرفة بالإجراءات الأمنية والمعلومات الاستخباراتية.. ???? كمان طريقة التنفيذ بتطرح أسئلة كبيرة، لأن زرع العبوة الناسفة بالقرب من منزل المنصوري معناه إن فيه مراقبة دقيقة لتحركاته، واحتمال وجود اختراق لدائرته الأمنية أو معرفة مسبقة بروتينه اليومي.. ???? طيب مين الجهة اللي ورا العملية؟.. لسة مش معروف لكن فيه فرضية بتتكلم عن انتقام من خلايا متطرفة بسبب دور المنصوري السابق في العمليات ضد الجماعات المسلحة في أجدابيا ومناطق الجنوب، وفيه فرضية تانية بتربط الحادث بصراعات النفوذ. ???? أما الصدمة التالتة فجت من مصرف ليبيا المركزي، بعد ما المحافظ ناجي عيسى قدم استقالته من غير ما يكشف الأسباب.. وقال إن التفاصيل "حساسة" ومش قادر يعلنها.. ???? الاستقالة جاية في وقت حساس جدا، بعدما تجاوز سعر الدولار حاجز 9 دنانير في السوق الموازية، ووسط أزمة سيولة مستمرة، وضغوط متزايدة على العملة المحلية، وكمان اتهامات بوجود تدخلات سياسية متصاعدة في قرارات المصرف المركزي.. ???? وخطورة الاستقالة مرتبطة بالظروف اللي وصل بيها للمنصب.. ناجي عيسى اتعين محافظا للمصرف سنة 2024 بعد تفاهم معقد بين الشرق والغرب، أنهى وقتها أزمة حادة على إدارة المصرف كانت وصلت لدرجة إغلاق حقول نفطية وتراجع صادرات النفط.. ???? وعشان كده، أي خلاف جديد حولين بقائه أو حول اختيار بديل يحظى بقبول الأطراف المختلفة، ممكن يعيد أزمة الانقسام للمؤسسة الأهم ماليا في البلاد، وهي المؤسسة اللي بتدير عائدات النفط وبتتحكم في تمويل مؤسسات الدولة المتنافسة.. ???? رغم إنه مفيش معلومات أو أدلة بتقول إن فيه جهة واحدة ورا هجمات المسيرات في الزاوية، واغتيال فوزي المنصوري، واستقالة محافظ المصرف المركزي، إلا إن الأحداث بتتقاطع عند نقطة واحدة واضحة.. ضعف المؤسسات أمام نفوذ السلاح والصراعات الداخلية.. فـ ربنا يحفظ ليبيا ويجعلها آمنة مستقرة موحدة والأحداث الحالية تكون عابرة..