وصول فريق المفاوضات الى مصر
???? في حدث تاريخي بيتحضر دلوقتي على أرض مصر في مفاوضات شرم الشيخ...
????لو مش عارف لسه آخر التطورات ايه، ف خليني اقولك ان من شوية وصل وفد امريكا واسرائيل وفيهم (جاريد كوشنر) و(رون ديرمر) عشان يناقشوا بنود الاتفاق... ولحد دلوقتي الأطراف المصرية والفلسطينية متمسكة بإن يكون في وقف شامل لاطلاق النار وانسحاب اسرائيلي من معظم مناطق غزة قبل ما يتم البدء في تنفيذ اي تبادل للأسرى...
???? بس المفاجأة بقى هي ان الرئيس المصري عبد الفتاح السيسي خرج من شوية بتصريح مهم جدًا انك تفهم معناه والغرض من وراه، والاحتمالات الكبيرة اللي ممكن يفتحها للقضية الفلسطينية...
⚫️????️ قال اننا "بندعو الرئيس ترامب إنه يزور مصر ويحضر توقيع اتفاق وقف إطلاق النار لو تم التوصل إليه."
الكلمة دي ممكن للوهلة الأولى تبانلك مجرد دعوة بسيطة، بس لو ركزت شوية وحللت المعنى وراها، هتلاقي ان اللي مستخبي بين السطور حاجة كبيرة ومهمة جدًا فوق ما تتصور... وخليني أشرحلك ازاي ????
???? زي ما انت عارف، ترامب بقاله فترة بيحلم بجايزة نوبل للسلام، ومن فترة قال في تصريح رسمي انه "أوقف 7 حروب في 7 أماكن مختلفة في 7 شهور"... وإن "عدم منح الجائزة للولايات المتحدة سيعد إهانة عظمى لأميركا"...
الموضوع واصل معاه لدرجة انه هدد النرويج نفسها اللي فيها اللجنة المانحة للجائزة، بإنه ممكن يطبق عليهم تعريفات جمركية ضخمة، ومقالش طبعا ان السبب هو نوبل، بس انا وانت عارفين يعني...
???? ف لما الراجل يكون بيحلم بجايزة نوبل للسلام ومتمسك بيها و"شبطان بالشكل ده... تعالى بقى يا باشا نحقق السلام وهنديك اللقطة التاريخية حتى لو مفوزتش بنوبل، بس هنكسب احنا كمان كتير، ويبقى Win Win Situation، وعرض جذاب جدًا لرجل صفقات زي ترامب...
طب ازاي؟!
1️⃣???? أول حاجة، لما ترامب ييجي بنفسه هنا مصر ويوقع الاتفاقية بعد ما يتم تحديد بنودها وتظبيطها، وكمان يترشح بسببها لنوبل حتى لو مفازش بيها، ف ده هيبقى أكبر ضمان لإن الاتفاقية مينفعش يتم خرقها بعد كده.. لإنها هتبقى في وش وسمعة ترامب بشكل مباشر، وأي خرق ليها هيكون إهانة مباشرة للولايات المتحدة والشعب الأمريكي مش هيسكت...
2️⃣???? تاني حاجة هي إن الدعوة دي مش بس رسالة لترامب... دي رسالة للعالم كله إن مصر دلوقتي هي اللي ماسكة الخيوط كلها مرة تانية، بعيد عن أي وسطاء تانيين... وإن أرض مصر بقت المسرح الوحيد اللي ممكن يتولد منه سلام حقيقي في المنطقة...
️ 3️⃣???? تالت حاجة بقى هي إن دي ضربة دبلوماسية ذكية جدًا لنتنياهو.. قولي ليه...
عشان اللي بيحصل ده دلوقتي معناه انه اتزنق زنقة ما يعلم بيها إلا ربنا.. عشان حضور ترامب بنفسه لمصر (لو وافق يعني) هيبقى معناه إن الملف خلاص خرج من إيد إسرائيل، وبقى في إيد أمريكا ومصر... وده بالتالي معناه إن نتنياهو هيبقى فقد آخر ورقة كان بيلعب بيها…
????️ الورقة اللي كان بيستخدمها عشان يطوّل الحرب ويهرب من المحاكمات اللي مستنياه في تل أبيب، اللي هي ورقة المفاوضات وتعطيلها وطلب شروط معقدة وغير منطقية وغير عادلة...
???? ترامب لو جه شرم الشيخ فعلاً، فالصورة اللي العالم هيشوفها مش هتكون "نتنياهو ينتصر ويحقق أهدافه في الحرب على غزة"... لأ... هتبقى الصورة اللي هينقلها الإعلام هي: "ترامب يوقع على اتفاق سلام تاريخي في مصر"...
ودي لقطة كفيلة مش بس كفيلة تدفن مستقبل نتنياهو السياسي، دي قادرة تمحيه من التاريخ...
???? عايزك بس تتخيل معايا المشهد ده لو حصل، وصممتهولك بال AI عشان يساعدك تشوفه بنفسك ????
(ترامب واقف مبتسم، ورئيس مصر جنبه، ووفد حـ.ـمـ.ـا.س اللي نتنياهو كان بيتعهد باغتيالهم "في أي مكان على وجه الأرض" قاعدين على الترابيزة بيوقعوا اتفاقية انهاء الحرب، بعد كام يوم من ظهورهم تحت سماء شرم الشيخ وفي وسط الناس من غير ما أي كلب يقدر يستهدفهم ولا يفكر حتى انه يعمل معاهم أي حاجة)...
???? اللقطة دي يا صديقي لو حصلت، هتبقى لقطة تاريخية هتتطبع في ذاكرة العالم وهتسجلها كتب التاريخ للأبد...
????️ ولو حطيتها جنب اللي حصل لسمعة وشكل الصهاينة والدولة الإسرائيلية غير الشرعية قدام العالم كله، وكام شعب ودولة أصبحوا دلوقتي شايفينهم على حقيقتهم وبيقطعوا العلاقات معاهم أو بيهاجموهم في الإعلام، وكام مظاهرة بتخرج ضدهم في كل بقعة من الكوكب؛ هتلاقي ان ده هيكون معناه نهاية 75 سنة من الهيمنة الصهيونية على المشهد الدولي... وخسارة سياسية لا تعوض، هتقضي على عشرات السنين ومئات الملايين وربما المليارات من الدولارات، اللي اتصرفت على تجميل شكل الاحتلال أمام العالم!
???? وبعدين ما تنساش إن الدعوة جاية في توقيت حساس جدًا، قبل إعلان جايزة نوبل للسلام بأيام قليلة (يوم الجمعة الجاي الإعلان عنها)، وفي وسط موجة انتقادات عنيفة داخل أمريكا لسياسات ترامب الخارجية، بيسأل فيها الشارع الأمريكي كله عن السبب اللي بيخلي ملياراتهم بتروح لتسلّيح جيش بيقتل الأطفال في غزة...
????️وعشان كده، الدعوة دي بالنسباله فرصة ذهبية يغسل بيها صورته قدام الرأي العام الأمريكي، ويقولهم أنا مش بحارب... أنا بصنع السلام... وده بالضبط اللي مصر عايزة توصله للعالم... إنها هي اللي بتدي للأزمة وجه إنساني وسياسي في نفس الوقت...
???? والأهم من كل ده، إن مجرد قبول ترامب الدعوة أو حتى تفكيره في قبولها، معناه إن أمريكا خلاص قررت تكون جزء من اتفاق نهائي شامل مش مجرد هدنة مؤقتة... وده اللي بتضغط مصر دلوقتي لتحقيقه...
إن الاتفاق يكون كامل، بانسحاب تام، وضمانات دولية،
مش لعبة هدنة تستمر أسبوعين وبعدها يرجع القصف تاني...
????️ ف يا ترى بقى ترامب هيوافق ولا هيرفض؟
ده اللي هنشوفه خلال الساعات اللي جاية.. لكن في تقديري الشخصي معتقدش انه هيقدر يقاوم فرصة زي دي عشان يصنع لنفسه تاريخ سياسي غير مسبوق...
???? هسيبلك مصادر لكل التفاصيل دي في أول كومنت ???? ولو وصلت لهنا متنساش تعمل شير وتشارك الموضوع مع غيرك عشان الكل يعرف ايه اللي بيحصل دلوقتي..
مساء الفل.
⇧
