امريكا تبدا حرب اقتصادية على ايران

???????? ترامب بدأ حرب عالمية اقتصادية على إيران بعد ما فشل في حسم المعركة معاها عسكريًا... والحرب دي للأسف مش هتقف عند حدود طهران، بل ممكن فاتورتها توصل لكل دولة في العالم تقريبًا بشكل أنت متتخيلوش... ????من كام ساعة فاتوا، الإدارة الأمريكية أعلنت رسميًا عن بدء حرب اقتصادية جديدة ضد إيران باسم Operation Economic Outcast، أو "عملية المنبوذ الاقتصادي"، ووزير الخزانة الأمريكي سكوت بيسنت وصفها بإنها هتبقى Economic D-Day... يعني "يوم إنزال اقتصادي" شبيه بإنزال النورماندي في الحرب العالمية التانية... يعني من الآخر عايزين يوصلوا للناس إن دي مش مجرد حزمة عقوبات جديدة، بل بداية هجوم اقتصادي شامل هدفه عزل إيران عن العالم... أول ضربة في العملية استهدفت حوالي 60 شخص وشركة وكيان وسفينة مرتبطة بإيران، لكن الأخطر بكتير من الأسماء هو انهم وسعوا الدايرة عشان تشمل قطاعات حساسة جدًا زي الشحن البحري والطيران والتكنولوجيا والذهب والأصول الرقمية، بالإضافة لشبكات النفط والتمويل اللي بتستخدمها إيران عشان تكسر الحظر الأمريكي... لكن المشكلة بقى مش في كل ده... الخطير في الموضوع فعلًا المرة دي؛ هو حاجة اسمها العقوبات الثانوية... يعني أيه؟ يعني أي جهة بتساعد إيران أيًا كانت هيتم توقيع عقوبات عليها هي كمان... مش مهم بقى لو أنت شركة صينية، بنك تركي، شركة شحن في سنغافورة أو وسيط في هونغ كونغ، وملكش أي علاقة مباشرة بأمريكا... لو أمريكا شمت خبر إنك بتساعد إيران تبيع نفط أو تحول فلوس أو تتجاوز الحصار بأي وسيلة مهما كانت، هتمنعك تمامًا من الوصول للدولار أو التعامل مع نظام SWIFT المالي الأمريكي وهتعزلك عن العالم الغربي كله... وترامب بالفعل بدأ يجري اتصالات مباشرة بقادة دول العالم ويطلب منهم وقف تعاملاتهم الاقتصادية مع إيران، وإلا هيدخلوا في قائمة العقوبات... حصار اقتصادي غير مسبوق على طهران وبقرار أحادي وفردي من أمريكا، بدون أي موافقة من مجلس الأمن... ⚫️ لكن المشكلة إن التحركات دي اصطدمت بصخرة صلبة وكبيرة... الصين... الصين هي الشريان الحيوي الأول لإيران والمشتري الأكبر للنفط الإيراني، وكانت قبل تشديد الحصار الأمريكي بتستحوذ على النسبة العظمى من صادرات الخام الإيراني، وفي تقديرات بتوصلها لحوالي 80% أو حتى 90% من النفط اللي إيران بتصدره بحرًا! وعشان كده، الصين عارفة إن هدف ترامب الحقيقي من الحصار الاقتصادي ده؛ مش بس إيران، بل تضييق الخناق على نفوذ بكين ومصادر طاقتها قبل القمة المرتقبة بين ترامب والرئيس الصيني شي جين بينغ في البيت الأبيض... أمريكا لسه لحد دلوقتي بتتعامل بحذر من الصين، وامتنعت عن حظر البنوك الصينية الكبرى أو المؤسسات الحكومية، لأن الخطوة دي لو حصلت هتفجر المواجهة بالكامل بين واشنطن وبكين... بس برغم كده؛ الصينيين ردهم كان قوي جدًا وهجومي... الخارجية الصينية من شوية أعلنت رفضها الكامل للقرارت دي، ووصفتها بـ "العقوبات الأحادية غير القانونية"، وقالت إن التعاون بين الصين وإيران بيتم في إطار القانون الدولي ومش من حق أي دولة في العالم تعطله مهما كانت هي مين... والأخطر هو إنهم حذروا من إنهم هيتخذوا "كل الإجراءات الضرورية" لحماية حقوقهم ومصالحهم لو الشركات الصينية اتعرضت لضغوط أمريكية... طب في إيديهم أيه يعملوه يعني؟ لأ في إيديهم كتير... الصين يا صديقي عندها بالفعل أسلحة اقتصادية تقدر توجع أمريكا جدًا، وأهمها هي إنها بتسيطر بالكامل تقريبًا على تكنولوجيا معالجة وتصدير المعادن النادرة والعناصر الأرضية الاستراتيجية اللي بتدخل في الصناعات التكنولوجية والعسكرية والرقائق والسيارات الكهربائية والطيارات الحربية المتقدمة والبطاريات! يعني أمريكا معاها الدولار والنظام المالي العالمي؛ بس الصين بتسيطر على سلاسل التوريد اللي الاقتصاد الأمريكي نفسه محتاجها... وعشان كده ترامب دلوقتي حط نفسه قدام معضلة كبيرة... لو ساب الصين تشتري النفط الإيراني، يبقى الحصار على إيران ما زال فيه ثغرة ضخمة هتخليه مالوش لازمة... ولو ضرب البنوك والشركات الصينية الكبيرة بعقوبات، ممكن الصين ترد عليه بعقوبات مضادة أو قيود أكبر على المعادن النادرة، وساعتها الموضوع هيوسع وهيتحول لحرب اقتصادية مباشرة بين واشنطن وبكين؛ وفي وقت حرج جدًا أمريكا بالفعل بتمر فيه بأزمة ديون مرعبة بعد ما حاجز الدين بتاعهم كسر الـ 40 تريليون دولار، وفي أزمة سندات كارثية عاملة مشكلة كبيرة في وول ستريت دلوقتي! ????️ خلينا نكمل تفاصيل المعركة الاقتصادية دي في جزء تاني من البوست تاني هكتبه بعد شوية أو ممكن بكره، عشان منطولش كتير هنا، وهنحكي فيه عن التأثير على دول الشرق الأوسط وعلى ايران نفسها... ???? ولو وصلت لهنا متنساش تعمل شير ضروري عشان الموضوع يوصل للناس كلها... شكرًا. ✍️ عبدالباسط صابر