الصفقه الكبرى امريكا توافق على تخصيب اليورانيوم للسعوديه
???? الصفقة الكبرى.. ليه السعودية ردت بالصمت على إهانات ترامب وبتتحالف دلوقت عسكرياً مع أمريكا؟
(حلم ولى العهد... البرنامج النووي السعودي)????
شبكة CNN نشرت تقرير مبني على مصادر ووثائق بيقول إن الإدارة الأمريكية وافقت مبدئياً إنها تسمح للسعودية بتخصيب اليورانيوم من غير ما تطبق الضمانات الدولية المعتادة اللي بتمنع تطوير الأسلحة النووية... علماً إن المفاوضات بين أمريكا والسعودية فى الملف ده انتهت في أكتوبر 2025، لكن مسودة الاتفاق كانت بأنتظار توقيع ترامب.
????أسباب التأخير المعلنه ???? الحرب مع إيران (واللي ترامب بيقول إن جزء من أسبابها هو منع إيران من امتلاك السلاح النووي)... وتردد إدارة ترامب من إن الكونغرس يرفض الاتفاق بإجماع من الحزبين (الجمهوري والديمقراطي) ويوقف تنفيذه...
اما السبب الغير معلن هو ضمان انخراط الرياض ومن ثم دمشق فى الصراع بشكل مباشر..
???? الخبراء الامريكان شايفين إن لاتفاق ده ممكن يفتح سكة للسعودية لامتلاك سلاح نووي لو مفيش ضمانات قوية.. خصوصاً إن ولي العهد السعودي «محمد بن سلمان» هدد قبل كده إنه هيمتلك قنبلة نووية لو خصمه الإقليمي (إيران) امتلكتها... يعنى الخلاف كله إن الاتفاق ده بيسمح بدرجة معينة من تخصيب اليورانيوم أو إعادة معالجة البلوتونيوم محلياً... وده بند غير مسبوق لأن العادي إن الدول بتشتري اليورانيوم المخصب من أمريكا أو روسيا تحت إشراف دولي بدل ما تنتجه بنفسها.
❗من فترة طويلة، قلتلكم إن السعودية عندها طلب واحد بس من أمريكا، وعشان الطلب ده هي مستعدة تعمل أي حاجة.. سواء تطبيع، أو دعم سياسي وعسكري......إلخ.
الطلب ده هو (البرنامج النووي...وتخصيب اليورانيوم على ارضها)وقتها قلتلكم إن السعودية مش بس عايزة تبني مفاعلات دي بتخطط لبعيد أوي.. وعشان نفهم إيه اللي بيحصل دلوقتي، تعالوا نرجع بالزمن كام أسبوع لورا ونربط الخيوط ببعضها.
????كلنا لاحظنا حالة الجمود المفاجأة في الموقف السعودي من الحرب الأمريكية الإسرائيلية على إيران... وخصوصاً بعد ما ترامب طلع بتصريحات علنية مسيئة جداً لولي العهد السعودي (لما اتكلم بأسلوب فج عن فكرة الخضوع لأمريكا). الطبيعي في لغة السياسة إن إهانة زي دي تقطع حبال الود، أو على الأقل تخلق أزمة دبلوماسية طاحنة... والجميع توقع ان السعودية اخدت موقف ومنعت استخدام اراضيها لقصف ايران... وإيران مكنتش بترد على امريكا فى السعودية لفترة كبيرة... لكن فجأة وبدون مقدمات بعد حوالى 3شهور نلاقي ضربات سعودية قوية على اليمن وبمباركة أمريكية كاملة على لسان ترامب... ( المطار)
تفتكروا إيه اللي يخلي دولة بحجم السعودية تبلع إهانة علنية من رئيس أمريكي، وبعدها بشوية تتحالف معاه عسكرياً في ملف معقد زي اليمن وإيران؟
هنا بقى مربط الفرس.. {بحر اليورانيوم}
????عشان نجاوب على السؤال ده، لازم ننعش ذاكرتنا بمعلومة مهمة جداً وهى إن السعودية اكتشفت من كام سنة إنها مش بس بتعوم على بحر من البترول... دي بتعوم على بحر من "خام اليورانيوم" والقيادة السعودية قررت تنظر للمستقبل (مرحلة ما بعد النفط) وشافت إن المستقبل في الطاقة النووية.
????السعودية قالت لأمريكا بوضوح ... (إحنا مش عايزين نشتري منكم يورانيوم مخصب ونبقى تحت رحمتكم.. إحنا هنستخرج الخام بتاعنا، ونخصبه عندنا، ونصدره للعالم كمان.. وبدل ما نكسب ملاليم من الخام هنكسب مليارات من المخصب) ... أمريكا بقى كانت رافضة تماماً ومتمسكة بحاجة اسمها المعيار الذهبي (زي اللي عملته مع الإمارات فى 2009)، وده بيمنع أي دولة من تخصيب اليورانيوم على أرضها عشان ميتحولش لسلاح نووي.
طب إيه اللي خلى أمريكا تتنازل وتوافق دلوقتي حسب تسريبات CNN؟
????السياسة يا جماعة مفهاش عواطف، فيها هتديني إيه وتاخد إيه... وترامب كان محتاج السعودية بشدة في حربه ومواجهته مع إيران محتاج منها الغطاء الإقليمي عشان يتحرك عسكرياً ويضغط على حلفاء إيران (زي الحوثيين في اليمن).
وفي المقابل، محمد بن سلمان قرر بيلعب بوكر سياسي... وشاف إن الفرصة قدامه ودي اللحظة التاريخية اللي يقدر يلوي فيها دراع الإدارة الأمريكية... يعنى بأختصار "عايزين دعمنا في اليمن وضد إيران؟ وندخل سوريا قدام حـ الله ـزب وعايزين صفقات بمليارات لشركاتكم؟
تمام.. بس تدوني الموافقة على تخصيب اليورانيوم، ومن غير توقيع على تفتيش دولي كمان اللى هو (البروتوكول الإضافي).
????أمريكا لقت نفسها بين نارين يا إما ترفض، والسعودية تروح تدي عقود النووي لروسيا أو الصين... وساعتها أمريكا هتخسر الفلوس والنفوذ والرقابة مع بعض، يا إما توافق على شروط السعودية وتعمل اتفاقية استثنائية من (المادة 123) وتغمض عينها شوية عن الرقابة الصارمة. وغالباً على الورق أختارت أمريكا الحل التاني.
بس استنوا.. لأن في سؤالين مهمين جداً بيطرحوا نفسهم عشان الصورة تكمل.
إسرائيل فين من كل ده؟
♣️احنا عارفين إن إسرائيل عندها عقدة من أي برنامج نووي عربي وبترفضه شكلاً وموضوعاً... فهل الحسابات في تل أبيب دلوقتي ممكن تكون اتغيرت... يعنى هيوافقوا يطبعوا مع السعودية ويخلصوا من كابوس إيران ويدفعوا التمن بقبول وجود خطر نووي محتمل في السعودية ؟ هل ده يعقل.❗
ولا تل ابيب هتقدم موافقة مفخخة... عشان تخلص من إيران وتستنزف السعودية وساعتها ما يتبقى منها ومن الخليج هيبقى اسهل عندها من عمل كيك البرتقال.. لكن هنا هتحتاج تطبخها مع واشنطن.
♦️ودي بقى النقطة الأخطر... هل ترامب هيقدم اتفاق حقيقي للسعودية؟ ولا دي مجرد جزرة بيعشمهم بيها عشان ياخد غرضه ويجرجرهم لحرب كبرى فى الشرق الأوسط؟
لأن عادى جداً ترامب يستغل السعودية ويفضل يسوف ويماطل ( لأن نقل التكنولوجيا دى محتاج سنين) ولما تستنزف الرياض فى الحرب دي... يقولهم مع السلامة.
⁉️والاهم من كل ده...هل القيادة السعودية مش واخدة بالها إن ترامب ده هو نفس الشخص اللي أخل بكل اتفاقياته ومذكرات التفاهم مثالاً (زي ما مزّق الاتفاق النووي مع إيران بجرة قلم)؟
إزاي يضمنوا إن اللي باع قبل كده، أنه مش هيبيعهم في أول محطة بعد ما يخلص مصلحته؟
لحد دلوقت كل الاحتمالات متاحة... واللعبة لسه في أولها.????
⇧
