ترامب يأمر نتنياهو بالخروج من سوريا و لبنان
⛔️مين هيلوي دراع التاني؟.. كواليس الصدام العنيف بين ترامب ونتنياهو
⛔️من لبنان إلى سوريا.. الضغط الأمريكي الثقيل يضع عناد نتنياهو على المحك.
نتنياهو كان فاكر إن رجوع الصراع والمواجهات السخنة بين أمريكا وإيران هيديله "الضوء الأخضر" عشان يبرطع براحته ويتوغل في أراضي لبنان وسوريا من غير حساب.. بس الصدمة جت من حليفه الأول!
الرئيس الأمريكي دونالد ترامب طلعله "العين الحمرا" ورجع يؤمره بالانسحاب، ومش من لبنان بس، لا.. ده قاله كمان شيل إيدك من سوريا فوراً!
الخلافات بين ترامب ونتنياهو كانت تحت الرماد وبقت على المكشوف بقالها شهور، وخصوصاً لما الكيان رفض ينسحب من لبنان وقال بجراءة: "إحنا اللي بناخد قراراتنا بنفسنا ومش مستنيين أوامر من واشنطن!".
طبعاً الرد ده عصب ترامب لدرجة الجنون، وخرج بأسلوبه المعروف يلقح كلام ويقول: "أنا الزعيم هنا، والكيان ميقدرش يخالف أوامري.. ولولا أمريكا مكنتش إسرائيل دي بقى ليها وجود أصلاً!".
الموضوع موصلش لترامب وبس، ده نائبه "جي دي فانس" دخل على الخط بقلب جامد وقال للكيان بكل صراحة: "الآليات اللي بتضربوا وتتباهوا بيها دي أمريكية، وفي الواقع محدش في العالم بيطيقكم ومفيش حليف واقف في ضهركم غيرنا.. يبقى تسمعوا الكلام وإنتوا ساكتين!".
بعد القرصة الجامدة دي، الكيان تراجع خطوة واضطر يوافق على اتفاق مع الحكومة اللبنانية لإعادة انتشار تدريجي للجيش اللبناني مقابل انسحاب الكيان.
دلوقتي بقى، ترامب بعت رسالة واضحة وصارمة لنتنياهو: "استمرار وجود جيشكم جوة سوريا هيلغي كل حساباتنا وهيولع المنطقة لهب".
ترامب عايزه ياخد خطوة إعادة انتشار سريعة برة سوريا زي ما حصل في لبنان، والسبب الحقيقي؟ إن إدارة ترامب حالياً شغالة على "طبخة" اتفاق أمني جديد مع سوريا، والتوغل الإسرائيلي هيبوظ الطبخة دي كلها.
رغم إن نتنياهو لسه بيعاند ومتمسك بالسيطرة على المناطق الأمنية اللي دخلها، إلا إن ضغط البيت الأبيض المرة دي تقيل جداً.. يا ترى نتنياهو هيلوي دراع ترامب، ولا هينفذ الأوامر وهو حاطط رأسه في الأرض
الصور ما وراء الأحداث
