الكارت الاخير اوكرانيا تضرب روسيا 1000مسيره
????????زيلنيسكى قرر يلعب بـ الكارت الأخير .. ويضرب موسكو بـحوالى 1000 مسيرة وصاروخ في ليلة واحدة .. بخطوة استعراضية ممكن تكتب السطر الأخير في قصة للنظام الاوكرانى وتنهى دور العروسة المتحركة في حرب بالوكالة لصالح الغرب.
كوباية الشاي بتاعتك .. وتعالى نحلل العبث الي حصل .. ونعرف إيه اللي بيدور جوه المطبخ الروسي .. وليه أوكرانيا هي الخاسر الأكبر في اللعبة دي ؟
????النهاردة إحنا قدام تصعيد غير مسبوق أوكرانيا اللي بنيتها التحتية بتنهار وشبابها بيخلصوا في الجبهات، قررت بتوجيه ودعم استخباراتي غربي إنها ترمي كل ثقلها في هجوم ضخم على العاصمة الروسية... 992 طائرة مسيرة وصاروخ في موجات متتالية .. وكالعادة دى محاولة يائسة لجر روسيا لرد فعل مدمر يورط العالم كله ..وتصدير لصورة الانتصار الوهمي للرأى العام الغربي.
????بس لو ركزت شوية فى الضربات اللى اعتمدها النظام (الاوكرانى_الغربى) النهاردة .. هتلاقى إن الهجوم كان متعمد انه يضرب الحياة اليومية للمواطن الروسي عشان يخلق حالة فوضى ..والأهداف اللي اتضربت بتأكد العقلية دي...
اولاً .... ضربوا مصفاة النفط (كابوتينا )التابعة لـ "غازبروم" ودى اللي بتوفر 40% من البنزين لموسكو... وبالفعل نشب فيها حريق ضخم ودمار وطبعاً الهدف هو خنق العاصمة في الوقود.
ثانياً .... 4 مطارات رئيسية (شيريميتيفو، فنوكوفو، دوموديدوفو، وجوكوفسكي) توقفت تماماً والرحلات اتلغت، والمدارج اتضررت
ده غير حالة الذعر بين المسافرين المدنيين.. الاستهداف كمان طال محطات تحويل كهرباء وحطام المسيرات اللي اعترضتها الدفاعات الروسية وقعت على مجمعات سكنية ومراكز تجارية وخلفت عشرات المصابين.
????صراحة الضربة دي وضعت القيادة الروسية في موقف معقد جداً الرئيس #بوتين حالياً بيواجه ضغط مزدوج ...من ناحية في إحراج للقيادات العسكرية (إزاي سرب بالضخامة دي قدر يوصل لسماء العاصمة؟).. ويخترقوا أنظمة (إس-400) و(بانتسير)ومتوقع جداً نشوف إقالات وقد تصل لمحاكمات عسكرية للقيادات المسؤولة عن الفشل الاستخباراتي والدفاعي ده... ومن ناحية تانية الصقور في الكرملين والقيادات القومية بيضغطوا بقوة لرد يمسح كييف من الخريطة ... حسب رؤيتهم، سياسة ضبط النفس مع نظام بيحارب بالوكالة بالشكل ده مبقتش تنفع .. وإن الغرب بيختبر الخطوط الحمراء الروسية بأيادي أوكرانية فخلينا نوريهم عيون موسكو الحمرا... والحل بالنسبة لهم هنا هو الرد بأسلحة غير تقليدية (تكتيكية نـ99ية) ... وبالمناسبة بناء على متابعة شخصية منى .. ده رأى غالبية الشعب الروسى تقريباً ...خاصة مع تكرار الاستفزازت فى الشهور الاخيرة وزيادة فى وتيرة احداث زى الاستيلاء على ناقلات النفط الروسية والاستفزازات الغربية المتكررة خارج الحدود الروسية على كل المستويات .
????الواقع النهاردة مضاعف فى التأثير .. لأن الشارع الروسي صحي على كابوس وصفارات إنذار .. وطبعاً المعارضة الروسية (المدعومة من الخارج) ما بتصدق تلاقى الفرصة ودول (الحقيقة مينفعش اكلمكم عنهم هنا باستفاصة او انشرلكم صور من تجمعاتهم وندواتهم ) لانهم شكل غريب عن اللى تعرفه من اشكال المعارضة.. هما بيحاولوا يتستغلوا اللحظة دى عشان يروجوا إن النظام فشل في حماية شعبه.. وبيستهدفوا الشباب المتحرر على الأخر و اصحاب الميول الغربية . (اللبيب سيفهم المعنى)...
كمان بيلعبوا على العقد الاجتماعي اللى بين بوتين والشعب الروسى اللى اتبني على معادلة "أنا أوفر لكم الأمن والاستقرار والقوة .. وأنتم تدعمون الوطن بأخلاص وتقفون خلف قيادتكم" وطبعاً هما طول الوقت بيفصلوا الهجمات بالملى عشان يحاولوا يكسروا المعادلة دي.
❗لكن في المقابل الهجمات من النوع ده بتجيب نتيجة عكسية تماماً وبدل ما الشعب يثور على بوتين زى ما بيخططوا .. الغضب الشعبي بيتوجه حالياً ناحية أوكرانيا والغرب .. وده بيقدم لـ بوتين شيك على بياض لاتخاذ قرارات أكثر قسوة وتعبئة عامة فى أي وقت يحب و من غير أي معارضة داخلية.
⚫على الجانب الأخر .. لو سيبنا لغة الصواريخ وبصينا على لغة الأرقام .. هنلاقي إن النظام الأوكراني بيضحي ببلده كما قال الكتاب وعندك اقتصاد انكمش لحوالى النصف.. وبنية تحتية اتدمرت بنسبة تتجاوز الـ 70%...و الديون الخارجية غرقت البلد لأجيال قدام. لدرجة إن شركات الاستثمار الغربية الكبرى بدأت تستحوذ على الأراضي الزراعية ومقدرات الدولة كضمانات للديون.. ده غير أطنان الثروات والمعادن اللى بتخرج بتراب الفلوس .. ده أبرز انواع الأستعمار فى العصر الحديث .. إياك تكون فاكر انهم بيدعموا اوكرانيا مجاناً لوجه الله او لخاطر عيون زيلو .
▪️ده غير الكارثة الديموغرافية لأن فى ملايين هربوا بره البلد .. وجيل كامل من الشباب بيخلص في الجبهات... ونظام كييف بدل ما يكون عاقل ويختار السلام وحسن الجوار مع قوة عظمى زي روسيا ويبقى هو جزء اصيل من قوة عظمى .. او حتى يحافظ على اللي باقي من بلده ..لاااا ده اختار يكون مخلب قط للناتو او بالأحرى هو تم تأهلية من البداية عشان الهدف ده وقرر يكون كارت ع الطاولة
????النتيجة واضحة زى ما حضراتكم شايفين أوكرانيا بتتحول لـ أرض محروقة عشان الغرب يصفي حساباته ويمتلك فى المستقبل قطعة على حدود روسيا كانت يوما ما تمثل كبد الاتحاد السوفيتي.
رقعة الشطرنج بتتقلب ... والعروسة الخشب اللي الغرب بيحركها
هتدفع التمن غالي أوي ولكن كالعادة فى لحظة غير متوقعة.
( والله يرحم القذافى .. كان له نظرة).
❔يا ترى لو الدب الروسي قرر يرد الضربة ويفتح أبواب الجحيم ويحقق للغرب امنياته ..هل الغرب هينزل بجيوشه يدافع عن كييف ولا هيسيبوهم يواجهوا مصيرهم لوحدهم؟
كتب عبدالباسط صابر
⇧
