اسرائيل تموت عطشا بسبب القدرة الالهيه

???? خد الخبر الحلو ده وادعيلي؛ محطات المية في إسرائيل كلها تقريبًا عطلت فجأة، والمستوطنين مش لاقيين مية يزرعوا، والمثير إن السبب مش بفعل بشر... ده من عند ربنا! (والخبر الحلو في آخر فقرتين) ???? عكارة بحر شديدة ظهرت فجأة في البحر المتوسط، ومعاها كميات ضخمة من الطحالب الميكروسكوبية جاية—بحسب ادعاءاتهم—من دلتا النيل في مصر، اتسببت في انسداد وتوقف معظم محطات التحلية بتاعتهم تقريبًا، في موقف حرج بيهدد بتدمير موسمهم الزراعي كله وتراجع مخزون مية الشرب! ????️ طب إيه اللي حصل بالظبط؟ شوف يا سيدي... إسرائيل بنت جزء ضخم جدًا من أمنها المائي خلال السنوات اللي فاتت، على تكنولوجيا تحلية مياه البحر المتوسط... وبالتالي عندها سلسلة من محطات التحلية العملاقة منتشرة على الساحل، بتسحب مية البحر وتعالجها وتضخها داخل شبكة المياه... لكن من كام يوم، حصل شيء غير معتاد... مية البحر بدأت تسجل مستويات مرتفعة جدًا من العكارة، ناتجة عن تكاثر واسع لطحالب دقيقة ميكروسكوبية، حجمها صغير جدًا لدرجة إنها اخترقت الفلاتر وسدت منظومة التحلية بالكامل! طبعًا هما بيقولوا إن جزء كبير من الطحالب دي جاية من منطقة دلتا النيل في مصر بحسب تحليل صور الأقمار الصناعية، لكن ده كلام غير مؤكد... والظاهرة دي تسببت في شلل 5 محطات تحلية رئيسية من أصل 6، وهي أشدود، أشكولون، بلماحيم، وشورك 1 وشورك 2... وعلى مدار الساعات اللي فاتت المحطات دي حاولت ترجع تشتغل تدريجيًا، لكن موجات عكارة جديدة طازة وصلت من البحر، فأجبرتهم يقفلوا المنشآت تاني ويوقفوا شبكة المية كلها! ????️ والمصيبة الكبيرة بقى ظهرت في الزراعة... في منطقة نيتسانا القريبة من الحدود المصرية، عشرات المزارعين بيعتمدوا على المياه المحلاة في حوالي 80 إلى 90% من احتياجاتهم... وانقطاع المية ده جاي في أسوأ وقت ممكن... ليه؟ لإنهم خلصوا خلال الأسبوعين اللي فاتوا زراعة الطماطم والخيار والفلفل والباذنجان ومحاصيل تانية، ودخلوا دلوقتي مرحلة حساسة جدًا بتحتاج حوالي 1500 متر مكعب من المياه كل ساعة... وعارف بيوصلهم كام دلوقتي؟ من 300 لـ500 متر مكعب فقط! يعني أقل من ثلث الكمية المطلوبة، ولسه من شوية في خبر انهم وقفوا امدادات المية تمامًا... وعشان كده رئيس مجلس رامات نيغيف خرج يحذر بشكل صريح من إن حوالي 20 ألف دونم من محاصيل الخضروات أصبحت مهددة، وإن لو المية ما رجعتش فورًا، الموسم الزراعي بالكامل ممكن ينهار... والمنطقة دي حسب كلامهم بيخرج منها 2 مليون طن من الخضروات! يعني الموضوع مش مجرد شوية زرع هيبوظ... إحنا بنتكلم عن خسائر محتملة بملايين الشواكل، هترفع عليهم أسعار الأكل وتضرب الأمن الغذائي في مقتل... ????️ شوف سبحان الله يا أخي ???? بعد ما كانوا عمالين يتحالفوا مع إثيوبيا في سد النهضة عشان عايزين يعطشوا مصر ويضغطوا علينا في ملف المية، دلوقتي هما اللي بيواجهوا أزمة مية، وجاية من عند ربنا كده بطحالب طبيعية مش من عند حد! والقصة دي على فكرة مش عادية خالص، دي حاجة في غاية الخطورة لو انت لسه مش واخد بالك، لإنها كشفت عن نقطة ضعف قاتلة ومحورية في أمنهم المائي القومي... اتضح إن اعتمادهم الكلي على محطات تحلية مبنية كلها على ساحل واحد بيخليهم في غاية الهشاشة، وأي تغير طبيعي أو عكارة في البحر حتى لو صناعية، قادرة تخرج المنظومة كلها عن الخدمة في وقت واحد وتجيب عاليها واطيها... واخد بالك انت؟ بتفكر في نفس اللي بفكر فيه؟ ???? يالا بالشفا ❤️