وزير الخارجية يرد بقوة على العالم كله
????????????شوفوا العيل اللي عاوز يعمل كبير علي اسيادة..
????السفير بدر عبدالعاطي وزير الخارجية المخضرم اعلن امس عن موضوع في غاية الاهمية القصوي.
* رفض مصر للنظام الاقليمي الجديد. وقال الاقليم فيه دول كبيرة وأصحاب حضارات. مش شوية عيال هيعلمونا نمشيه ازاي. وبهذه الطريقة قال دي اوهام نظرية بيعتمد عليها الأمريكان مع الدلاديل اللي في منطقتنا من غير ما نقول هما مين علشان في ناس بتتقمص. بس الدلدول عارف نفسه كويس والكلمة هتيجي على مقاسه.
* رفض مصر لأي تواجد عسكري في البحر الاحمر من اي دولة غير متشاطئة فيه (إثيوبيا) وان الأمر بالنسبة لمصر خط احمر. وان عسكرة البحر الاحمر كلفتنا 600 مليون دولار خسائر شهرياً يعني الراجل بيتكلم بالاسباب والمنطق والعقل مش محتاجة توضيح كتير.
* وصول مفاوضات سد النهضة لطريق مسدود. وان مصر بتحتفظ بحقها في الدفاع عن النفس. يعني الأمر كده وصل لمرحلة العدوان وإحنا مضطرين ندافع عن نفسنا. امتى. مالكش فيه. في الوقت اللي احنا نشوفه مناسب وبالطريقة اللي نشوفها مناسبة برضو.
* الحفاظ على القضية الفلسـطينية وإقامة الدولة على حدود 4 يونيو طبقاً لقرارات مجلس الأمن والشرعية الدولية. وان السلام مع الكيان خيار الدولتين مع بعض مش خيار مصر لوحدها.
الحقيقة ان تصريحات السفير بدر عبدالعاطي مش محتاجة توضيح. ده الكلام اللي قولناه من يوم ما ترامب زار الخليج. وده الموقف المصري الواضح من سردية الشرق الاوسط الجديد. والرفض الواضح لتجريد سادة الاقليم وشعوبه اصحاب التاريخ الحضاري الطويل من كل حقوقهم. سواء مياه النيل او قناة السويس والبحر الاحمر او حتى حقوق شهداء مصر في فلسـطين.
الموقف المصري يوضح لك ليه القناة السعودية بتعمل كده. وليه المزدوج بيعمل كده. وليه رئيس الوزراء مستهدف بعد انباء ترشيحه للامانة العامة لجامعة الدول العربية. وليه وزارة النقل مستهدفة. ده لانها شغالة على مشروعات كتير في الموانئ والطرق والمطارات والسكك الحديدية اللي هتقضي فعلياً على كل مقررات وخطط النظام الاقليمي الجديد القائم بالاساس على الإتفاقيات التجارية وطرق التجارة.
مش تقولي نسأل الحشاش انت بتشرب حشيش ليه. او تقولي اصل الطريق متسلم بايظ. او تدافع عن الايجار القديم وتحلف بحياة عبدالناصر وانت ليل نهار بتسب وتشتم فيه!!!
اللي بيهري بيهري علشان هذه الاسباب. ده اللي لازم كلنا نحط عيوننا عليه لان تنفيذه على الأرض بدأ بالفعل. ده كلام بيتنفذ دلوقتي مش بيتقال وخلاص. ولولا صمود ايران كان زمان المنطقة دي كلها رايحة في داهية.
ياريت نتفهم الامور جيدا ونقف مع بلدنا لو سمحتوا ونركز في المفيد. الباقي كله يتحل بسهولة ويخلص في دقيقة. المهم مقدراتنا واكل عيشنا وثرواتنا وحقوقنا التاريخية كلها محدش يهوب ناحيتها. لان هذه الحاجات لما بتروح مش بترجع تاني خااااالص!!
عبدالوهاب خليل
⇧
