إيران تفتك بإسرائيل على مسمع من العالم

????????????هل بدات شرارة الحرب العالمية الان إيران تفتك بإسرائيل ???? اسرائيل مشافتش دمار زي ده من ساعة حرب أكتوبر.. والضربات الإيرانية ممكن تكون شرارة حرب عالمية جديدة... طب ليه وازاي؟ عشان الحرب اللي بين إيران وإسرائيل دلوقتي مبقتش حرب بين دولتين... التطورات اللي حصلت من امبارح لحد النهارده خلت الموقف حاليًا أقرب لمسرح لحرب عالمية مصغرة... وكل دقيقة بتعدّي بتقربنا اكتر من الانفجار الكبير اللي ممكن يغيّر شكل الشرق الأوسط والعالم كله! ⚫️ خليني بقى أحكيلك في التقرير ده آخر التطورات اللي حصلت خلال الـ 24 ساعة اللي فاتوا، عشان تعرف احنا رايحين على فين بالظبط ???? شوف يا سيدي.. ???? اللي حصل امبارح بالليل مكانش رد عسكري عادي من إيران على اعتداءات اسرائيل... لأ... اللي حصل ده كان استعراض لقوة حقيقية، وفرض نفوذ وبداية لقواعد لعبة جديدة. الرد الإيراني جه منظم، وعنيف لدرجة مشافتهاش اسرائيل من أكتر من 50 سنة، وأربك قياداتها ودفاعاتها لدرجة إنهم لحد دلوقتي مش عايزين ولا قادرين يعترفوا باللي حصل! طب هو ايه اللي حصل؟ ???? اللي حصل يا صديقي فضيحة لأسطورة دولة الرب التي لا تُهزم... الساعة حوالي 9 ونص مساءً امبارح، تل أبيب اتحولت لساحة رعب... مئات الصواريخ والطيارات المسيرة الإيرانية اتضربت مرة واحدة في اتجاه الكيان، بعدد غير مسبوق وصل لأكتر من 500 صاروخ تم اطلاقهم على 3 دفعات... وبرغم ان نظام الدفاع الجوي الاسرائيلي "القبة الحديدية" تصدى لجزء كبير منها فعلًا، إلا ان بعدها بدقايق قليلة، العدد تفوق على قدرته على الاحتمال، وبدأ جزء منها يعدي بالفعل، وبدأت الإنفجارات تضرب قلب عاصمة الاحتلال بشكل مباشر لأول مرة من تأسيسها تقريبًا! ???? فجأة، الناس في تل أبيب صحيت على دوي انفجارات، وزجاج نازل من السما، ونار بتولع في شققهم... وحسب التقارير الإعلامية العبرية من صحف وقنوات زي “هآرتس” و”القناة 13”، فالدمار كان غير مسبوق.. حتى واحد من رؤساء البلدية في تل أبيب صرح بالنص كده لـ “هآرتس”: "لم يسبق لنا أن رأينا مثل هذا الدمار في المدينة من قبل"! مش هتكلم كتير عن اللي حصل، انت بعينك شفت الصور امبارح والسوشيال ميديا كلها كانت ومازالت مقلوبة.. اللي يهمنا بقى هو أيه حجم الضرر اللي اتسببت فيه الهجمات الإيرانية؟! ???? الضرر حسب التقارير الغربية اللي نقلت المشهد قبل ما الإعلام الصهيوني يلحق يعتم عليه، اتوصف بإنه أكبر ضربة إسرائيل تتعرض لها من سنة 1973! مباني كاملة وقعت، من ضمنها برج من 32 طابق، و300 شخص اتشردوا بعد ما بيوتهم بقت ركام.. وفي منطقة اسمها "رمات جان" لوحدها، في 9 عمارات اتهدت، ومئات الإصابات اتسجلت، غير أربع حالات وفاة مؤكدة.. ومش بس كده.. ???? الرد مش بس كان عنيف، بل جه بتكتيك جديد تمامًا. عشان لأول مرة تقريبًا إيران استخدمت غواصات بتطلق صواريخ باليستية من البحر، وجزء كبير من الصواريخ اللي استخدمتها كان فرط صوتي أو Hypersonic، وكمان وغيرت مواقع إطلاقها بالكامل عشان تضرب من زوايا مختلفة في نفس الوقت... ???? وفي خطوة تعتبر نقلة نوعية، إيران بدأت تضرب منشآت عسكرية حساسة جوه إسرائيل مش مجرد مستوطنات حدودية.. جيش الاحتلال اعترف رسميًا بـ 7 جرحى من جنوده بسبب صاروخ، ده غير استهداف واغلاق مطار بن غوريون، واستهداف قواعد جوية اسرائيلية جواها طيارات F-16 وF-35... وكمان المذهل هو انهم نجحوا في قصف مبنى وزارة الحرب ووزارة الأمن الاسرائيلية نفسها! ولحد دلوقتي، إسرائيل مش عارفة تغطي على حجم الخسائر، رغم محاولاتها المستميتة إنها تمنع المواطنين من تصوير أماكن الضرب، والصحف الأجنبية نشرت بالفعل صور وفيديوهات توضح حجم الدمار اللي حصل.. ???? والمرعب بقى مش كل ده... المرعب هو إن دي كانت مجرد الضربة الأولى... إيران قالت بعدها ان كل ده لسه تمهيد... والمتحدث العسكري الإيراني طلع بعدها في مؤتمر صحفي وقال إن اللي جاي “هيبقى 20 ضعف اللي فات”.. وده عشان حسب كلامه، فالهجوم اللي بيتحضّر حاليًا واللي المفروض هيبدأ كمان كام ساعة، هيشمل “2000 صاروخ موجه بالإضافة لطائرات مسيرة”! فتخيل انت لما القبة الحديدية الإسرائيلية فشلت قدام 300 ولا 400 صاروخ ومقدرتش تتصدى لجزء منهم.. تفتكر هيحصل ايه لما يتضربوا بـ 2000 صاروخ دفعة واحدة؟! ???? ولو انت متخيل ان دي مجرد تصريحات بتدي أرقام رمزية، هقولك انك غلطان. عشان إيران بالفعل عندها أكبر ترسانة صواريخ في الشرق الأوسط كله، بأكتر من 55 ألف صاروخ متنوع، منها صواريخ قصيرة ومتوسطة وبعيدة المدى، وجزء ضخم منها فرط صوتي من نوع “فتاح” و”سجيل-2”.، غير كمان صواريخ "خيبر" المرعبة... يعني 2000 صاروخ بالنسبالهم شوية فكة.. وهما قادرين يكملوا قصف في اسرائيل لمدة شهور، ويخلوا سكانها ميطلعوش من الملاجيء! ???????????? طب ليه بقى قلتلك في بداية المقال ان المؤشرات بتقول ان الحرب مبقتش مجرد حرب اقليمية بين إيران واسرائيل، وانها على وشك انها تتحول لحرب عالمية؟ عشان التوتر بعد الهجمات مبقاش توتر اقليمي.. ده وسع وبقى دولي وعلى مستوى العالم... 1️⃣ خد عندك... فرنسا بمجرد انتهاء الهجمات أعلنت دعمها الكامل لإسرائيل وانها هتشارك في الدفاع عنها ضد إيران... والهند كمان... 2️⃣ وعلى الناحية التانية، باكستان أعلنت رسميًا وقوفها في صف إيران عسكريا و"بكل قوتها وقدراتها.." وخلي بالك باكستان دولة نووية! ???? ده غير ان وزير الدفاع الباكستاني قال تصريح أقل ما يوصف بيه هو إنه قنبلة... قال: "هجوم اسرائيل على إيران تهديد خطير للسلام الإقليمي والعالمي... إيران شقيقة وليست دولة مجاورة... وإذا لم يتوحد المسلمون، فستصبح كل دولة هدفًا لمخطط اسرائيلي أكبر، وسيتم استهداف كل دولة على حدة في نهاية المطاف"... طب هل دي كل حاجة؟! 3️⃣ لأ.. رئيس كوريا الشمالية كمان أعلن استعداد بلاده للتدخل العسكري المباشر ضد اسرائيل وأمريكا للدفاع عن إيران.. ده غير إن في تقارير بتتكلم عن دعم صيني لوجيستي وعسكري بيتم تقديمه لإيران حاليًا، ودعم سياسي واقتصادي واسع من منظمة البريكس ومنظمة شنغهاي... ???? يعني الحرب مبقتش بين دولتين، دي بقت شبه محورين عالميين! 4️⃣ إيران كمان من كام ساعة هددت رسميًا إنها هتقفل مضيق هرمز وتمنع مرور أي سفن فيه.. وده واحد من أهم الممرات البحرية في العالم، وبتمر منه تقريبًا حوالي 20% من تجارة الكوكب كله.. ⚫️ ولو ده حصل... هيشل اقتصاد الكوكب كله، وهيبقى معناه المباشر هو ان مفيش نفط هيخرج من الخليج، ولا تجارة دولية هتمشي.. وامدادات الطاقة لدول الغرب وأمريكا هتبقى في خطر وممكن بلادهم تتشل بشكل كامل.. والمشكلة إن شركات الشحن بدأت بالفعل تغيّر مساراتها، وناقلات البترول مدية أوامر لسفنها انها تتجنب المضيق تمامًا! 5️⃣ كمان حسب تقارير عسكرية، فالولايات المتحدة بدأت تحرّك قواعدها الجوية في الخليج، وتحط حاملات الطائرات في وضع استعداد، عشان خايفين من ان الدعم الأمريكي المباشر لإسرائيل ممكن يخلّي إيران تضرب القواعد الأمريكية في دول الخليج، وخصوصًا قطر والبحرين والعراق… وده السيناريو اللي الإدارة الأمريكية بتحاول تتجنبه بأي تمن، خاصة ان إيران كانت وعدت انها هتضرب القواعد الأمريكية فعلًا في حالة “أي تدخل غربي مباشر”. ????⚪️⚫️ طب ومصر فين ورد فعلها أيه؟! مصر لسه من شوية واخدة قرار مفاجيء ممكن يبان عادي بس الحقيقة انه له علاقة وثيقة باللي بيحصل... وزارة الآثار ومجلس الوزراء أعلنوا رسميًا تأجيل افتتاح المتحف المصري الكبير للربع الأخير من السنة بسبب الأوضاع الإقليمية... ودي مش خطوة عادية، ده مؤشر استخباراتي خطير، معناه إن القاهرة متأكدة إن الحرب دي مش هتقف عند حدود إيران وإسرائيل، وإن احتمال توسعها واستمرارها لفترة طويلة بقى شبه مؤكد! وعشان كده ف قرار التأجيل ده هو واحد من ضمن قرارات بتتاخد دلوقتي على الأرض لرفع جاهزية واستعداد الجيش وتخزين السلع الاستراتيجية تحضيرًا لأي حدث هيحصل في المستقبل.. وهتلاقي اخبار عن الكلام ده على الصفحة الرسمية لمجلس الوزراء عشان كتير أوي ومش هقدر اكتبها كلها هنا.. ???? فيا ترى إحنا رايحين على فين؟ هل الحرب دي هتفضل في نطاق إيران وإسرائيل؟ ولا العالم كله على وشك انه ينجرف للهاوية وبداية حرب عالمية جديدة أسوأ من كل اللي فات؟ الله أعلم... بس المؤكد هو ان اللي حاصل دلوقتي ده هو أول مشهد في حكاية لسه شكلها هتطول وهتكبر أكتر بكتير.. ???? هتلاقي كالعادة كل التقارير الصحفية والمصادر اللي اعتمدت عليها في أول كومنت، والصور اللي مع البوست دي بتوضح حجم الدمار في تل أبيب ???? ولو وصلت لهنا متنساش تعمل شير عشان غيرك يعرف أيه اللي بيحصل في العالم دلوقتي.. شكرًا. ???? مصادر وتقارير صحفية واخبارية اعتمدت عليها في الكتابة ????