امريكا تضرب فنزويلا وتخطف رئيسها

???? أمريكا ضربت فنزويلا ودمرت دفاعاتها، وخطفت رئيس الدولة بالقوة من قلب سريره! تخيل تصحى الصبح تلاقي رئيس بلدك اتاخد بطيارة عسكرية على أمريكا، بدون محاكمات ولا قرارات دولية، ولا حد قادر يحميه... وفي نفس الوقت صوت الإنفجارات شغال بره الشباك عندك، ولما تفتحه تتفاجيء بمشاهد الدمار بعد ما القوات الجوية الأمريكية ضربت مناطق الدفاع الجوي، ونشرت قواتها على أرضك... وكل ده وبلدك مش قادرة تعملهم حاجة... ⚫️ أهو ده بالضبط اللي حاصل في فنزويلا دلوقتي بقالهم كام ساعة... تعالى كده خليني أحكيلك التفاصيل من البداية، عشان تبقى فاهم الحكاية كلها رايحة على فين... ???? ???? القصة كلها بدأت الساعة 2 صباحًا والناس نايمة... فجأة أصوات انفجارات متتالية هزت العاصمة الفنزويلية كاراكاس، والناس صحيت على صوت مقاتلات أمريكية من نوع F-35 تابعة للمارينز، جاية بتشق السما على ارتفاع منخفض، عشان تضرب القواعد العسكرية الرئيسية وبطاريات وأنظمة الدفاع الجوي كلها في وقت واحد، وتحولها لشظايا ولهب... وبعدين فجأة، الناس اللي بتحاول تعمل تليفوناتها عشان تفهم أيه اللي بيحصل، يلاقوا ان أبراج اتصالات اتعطلت، والكهربا نفسها بتقطع لدرجة ان أحياء كاملة في جنوب العاصمة تدخل في ظلام تام بسبب انقطاع الكهرباء، في مشهد أقرب لافتتاح حرب شاملة منه لضربة عسكرية محدودة... ???? وبعد دقائق قليلة من الضربة، وقبل ما أي جهة دولية أو إعلامية تقدر تفهم اللي حصل، الرئيس الأمريكي دونالد ترامب يطلع بنفسه على منصته Truth Social، ويعلن إن الولايات المتحدة نفذت عملية عسكرية ناجحة داخل فنزويلا، وإن القوات الأمريكية تمكنت من "القبض على الرئيس نيكولاس مادورو وزوجته، ونقلهم خارج البلاد"! متخيل يعني أيه في خلال نص ساعة تقريبًا، رئيس بلدك يتخطف من قوات Delta Force الخاصة، ويتنقل بره البلد، وطيران أمريكا يضرب الدفاع الجوي بتاعك من غير ما تلحق تقول هو في أيه؟! ???? وكل ده ولسه جيش بلدك مش عارف يعمل أي حاجة، ولا قادر يرد على الضربات الأمريكية... والله أعلم إذا كان مش قادر فعلًا، ولا اللي حصل ده كله كان متفق عليه، وكانوا بايعين رئيسهم لأمريكا عشان يتقوا شرها... محدش يعرف... المهم ان الضربة اللي حصلت دي كانت مدروسة بعناية شديدة، لأن الانفجارات بعدها اتركزت على البنية العسكرية للبلد.. بدايةً من مقرات القيادة، والقواعد الجوية الرئيسية في محيط العاصمة، وبعدين مراكز اتصالات استراتيجية، ومرافق مرتبطة بالسيطرة والتحكم... ???? التقارير من شبكة "أسوشيتد برس" ربطت الانفجارات بمحيط فويرتي تيونا (Fort Tiuna) —أكبر مجمع وقاعدة عسكرية في كاراكاس— وظهرت في التقرير صور ودخان قرب مواقع عسكرية، ومن ضمنها محيط قاعدة ومطار لا كارلوتا العسكري في العاصمة... وكل ده طبعًا كان هدفه شل قدرة الدولة الفنزويلية على الرد، خصوصًا في الجو، من غير الدخول في مواجهة مفتوحة أو احتلال مباشر للأراضي، على الأقل في البداية... ???? وبعد الضربة مباشرة، هيئة الطيران الفيدرالية الأمريكية أصدرت تحذير رسمي يمنع الطائرات الأمريكية من التحليق فوق الأجواء الفنزويلية بسبب "نشاط عسكري مستمر"... وده معناه إن الضربة دي مش مجرد حدث وخلص خلاص، بل إن واشنطن متوقعة إن لسه في أحداث جاية والوضع مستمر معانا شوية... ????️ طب فنزويلا عملت أيه بعد اللي حصل ده؟! ???? الحكومة البوليفارية الفنزويلية أطلقت بعد اللي حصل ده خطاب عام موجه للشعب كله، بتطلب منهم فيه النزول للشارع عشان يحموا البلد، وأعلنوا بدء تطبيق حالة الطواريء والخطر الوجودي... وبعدها وزير الدفاع الفنزويلي "فلاديمير بادرينو لوبيز" أعلن عن تعبئة عامة ونفير الحرب، وإن الجيش هيبدأ النزول في جميع أنحاء فنزويلا لمواجهة ما وصفه بـ "أسوأ عدوان على فنزويلا في تاريخها"... وإن الناس لا يجب أن تسقط فريسة للرعب والإرهاب اللي بتمارسه الولايات المتحدة... ???? وفي خلال الساعات اللي تلت الإعلان ولحد دلوقتي، ما ظهرش لسه أي دليل بصري أو رسمي مستقل يؤكد إن مادورو فعلًا في قبضة القوات الأمريكية غير تصريح ترامب فقط... لسه مفيش فيديو ولا صورة، ولا بيان من جهة دولية محايدة... والحكومة الفنزويلية نفسها ما اعترفتش بالقبض عليه، بل على العكس، ظهرت تصريحات من مسئولين في الحكومة بتتكلم عن استمرار الدولة وتفعيل حالة الطوارئ، في نفس الوقت اللي كانت فيه نائبة الرئيس ومسؤولين كبار بيطلعوا في بيانات مصورة بيخاطبوا الشعب... ومباشرةً بعد اللي حصل ده، روسيا وإيران أدانوا التصعيد ببيانات قوية جدًا ضد أمريكا، والصين لسه مطلعتش بيان لحد اللحظة دي، بس التقارير بتقول إن كان في وفد صيني موجود مع مادورو قبل 4 ساعات بالضبط من خطفه على يد القوات الأمريكية! ???? والغريب أكتر هو إن سوق النفط لسه لحد دلوقتي محصلش فيه انفجار في الأسعار زي ما هو كان متوقع، وده لأن فنزويلا أصلًا كانت شبه معزولة عن السوق العالمي، وبالتالي الأثر الاقتصادي المباشر كان محدود... والله أعلم لسه الأمور هتروح لفين... ???????? آخر تحديث حصل خالص هو ان وزير خارجية أمريكا قال في تصريحات نقلها سيناتور أمريكي في الكونغرس إن أمريكا خلاص "لا تتوقع أو تخطط لمزيد من الضربات في فنزويلا"... وغالبا كده هيمسكوا البلد لزعيمة المعارضة ماريا كورينا ماتشادو اللي كلمتك عنها في مقالات سابقة، عشان تسهل على امريكا سرقة النفط الفنزويلي.. زي ما عملوا في العراق قبلها... ???????? اللي حصل النهارده ده يا صديقي مش حرب عادية... ده كسر لكل القواعد والخطوط الحمراء في السياسة الدولية... لما بلد تخش تضرب بلد تانية ذات سيادة بشكل غير قانوني وتخطف رئيسها نفسه عشان تحاكمه عندها، يبقى احنا كده خلاص بنعلن رسميًا شهادة وفاة القانون الدولي، وبداية عصر جديد بلا خطوط حمراء... السيادة فيه للاقوى فقط... وده للأسف مؤشر خطير جدًا في بداية 2026... وربنا يستر على إيران والشرق الأوسط، لإن زي ما اتكلمنا مع بعض في مقالات سابقة، اللي حصل في فنزويلا ده مرتبط بشكل مباشر بخطة أمريكا واسرائيل ضد إيران، وبعدها الصين... ???? كامل التفاصيل والتقارير والمصادر اللي اعتمدت عليها هتلاقيها تحت في أول كومنت ???? وبإذن الله هتابع معاك تغطية شاملة للتفاصيل كلها خلال الساعات اللي جاية لحظة بلحظة... شكرًا. وللحديث بقية